Kiyev Milli Texnologiya və Dizayn Universiteti

Kiyev Milli Texnologiya və Dizayn Universiteti (KMTDU) — çoxşaxəli tədris, elm və innovasiya kompleksi olmaqla, geniş inkişaf etmiş infrastruktura və müasir maddi-texniki bazaya malikdir, həmçinin müxtəlif ixtisaslar üzrə çoxpilləli ixtisaslı mütəxəssis hazırlığını həyata keçirir. Universitet yüngül və kimya sənayesi, moda sənayesi, biznes, sənaye məhsullarının bədii-texniki modelləşdirilməsi və dizaynı, incəsənət, iqtisadiyyat və məişət xidməti, hüquqşünaslıq və digər sahələr üçün mütəxəssislərin hazırlanmasında flaqmandır. Bu, ölkənin texnoloji profilli ən qədim ali təhsil müəssisələrindən biridir. Universitet Ukraynada və xaricdə tanınan, elmi-innovativ fəaliyyət göstərən bir sıra unikal elmi məktəblərə malikdir. Kiyev Dəri Sənayesi Politexnik İnstitutu və Kiyev Toxuculuq İnstitutunun açıldığı 1 oktyabr 1930-cu il tarixi universitetin tarixinin başlanğıcı hesab olunur. 1944-cü ilin may ayında bu institutlar birləşdirilmiş və Kiyev Yüngül Sənaye Texnoloji İnstitutu adlandırılmışdır. Mütəxəssis hazırlığının mənşəyinə dair araşdırmalar göstərir ki, əslində bu fəaliyyəti dəri, xəz və toxuculuqdan kustar və kooperativ üsullarla məhsul hazırlayan sənətkarların peşə hazırlığına başlanıldığı XIX əsrin əvvəllərinə aid etmək olar. Bununla belə, bu mövzu hələ də ətraflı tədqiqatlar gözləyir.