Dağıstan Dövlət Universeteti

8 oktyabr 1931-ci ildə Dağıstan MSSR Xalq Komissarları Soveti "Dağıstan Aqro-Pedaqoji İnstitutunun açılması haqqında" qərar qəbul etdi. İnstitutun təntənəli açılışı Oktyabr inqilabının 14-cü ildönümünə təsadüf edirdi. Pedaqoji institutun açılması respublikanın mədəni həyatında mühüm hadisə oldu. Diyarın bu ilk ali təhsil müəssisəsi milli məktəblər üçün yüksəkixtisaslı müəllim kadrları hazırlamalı idi. Pedaqoji institutun ardınca, 1932-ci ildə Maxaçqalada tibb və kənd təsərrüfatı institutları da açıldı. Pedaqoji institutda dərslər 1931-ci ilin noyabrında başladı. İnstitutun birinci kursuna 75 tələbə qəbul edilmişdi, onlara 10 ştatlı müəllim dərs keçirdi. 1931-ci ildə institutda 3 şöbə fəaliyyətə başladı: ictimai-ədbi, kimya-biologiya və fizika-texnika şöbələri. Çətin maddi şəraitə, tədris sahələrinin və yataqxanaların çatışmazlığına baxmayaraq, tələbələrin əksəriyyəti birinci tədris ilini uğurla başa vurdu. Tələbələr imtahanları verib respublikanın rayonlarına yola düşdülər; onların qarşısında kəndlərdə (aullarda) instituta yeni tələbə qəbulu üçün fəal iş aparmaq barədə konkret tapşırıq qoyulmuşdu. Növbəti tədris ilində institutun strukturu dəyişdirildi. RSFSR Xalq Maarif Komissarlığının əmri əsasında aqro-sənaye pedaqoji institutları adi pedaqoji institutlara çevrildi. 6 yeni şöbə yaradıldı: riyaziyyat, fizika, kimya, tarix, biologiya, həmçinin dil və ədəbiyyat şöbələri. 1935-ci ildə pedaqoji institutda ilk buraxılış baş tutdu. Dağıstan məktəbləri ali təhsilli 39 müəllim qazandı. Bu vaxta qədər institutda 35 ştatlı müəllim çalışır və 260 tələbə təhsil alırdı. 1957-ci ildə SSRİ Nazirlər Sovetinin pedaqoji institutun bazasında Dağıstan Dövlət Universitetinin təşkil edilməsi haqqında qərarı qəbul olundu. Əyani şöbədə 5 fakültə təsdiq edildi: tarix-filologiya, fizika-riyaziyyat, təbiətşünaslıq, xarici dillər və mühəndis-texniki fakültələri.